SHILLONG: Adita salrangna skang Nagaland a·dokni Mon a·jao dosgri manderangko sipai dolrangni skatang goe so·otani ja·man, salgro salaram a·dokrango ra·gatenggipa Armed Forces (Special Powers) Act (AFSPA)-ko ra·galpilchina gita dabie Bristibar salo, salgro salaram a·dokrango donggipa dingtang dingtang dolrangni nangrime bikotgipa North East Students Organisation (NESO)-ni membor-rang, salgro salaramni pilak biaprangon jingjengatanirangko dakangtokaha.
Ia NESO-ara Garo Students Union (GSU), All Arunachal Pradesh Students’ Union (AAPSU), All Manipur Students’ Union (AMSU), Khasi Students’ Union (KSU), Twipra Students’ Federation (TSF), All Assam Students’ Union (AASU) aro Naga Students’ Federation (NSF) dolrangni nangrime bikotgipa dol ong·skaachim aro Bristibar salo ia dolrang pilakan a·doktangtango aro Guwahati songjinmaoba jinma asonge jingjengatanirangko dakangaha.
Salgro salaram a·dokrangoniko AFSPA-ko ra·galchina gita dabiangengon, Nagaland a·doko dos gri manderangko so·otanio jak donggipa sipairangni kosakoba rakbatgipa sastirangko on·china gita NESO dabiangaha.
Ia jingjengataniko dakani bidingo NESO-ni adviser Samujjal Bhattacharya, kobor ra·timgiparangna talataniko on·angengon, Meghalaya, Nagaland aro Mizoram a·dokrangni chief minister-rangde AFSPA-ko ra·galpilchina dabitokengoba Assam-ni chief minister aro NEDA-ni convenor Himanta Biswa Sarma-de maming ku·rangko on·skakujaenga ine an·tangni suk ong·gijaniko parakangaha.
“Nagaland a·doko dosgri manderangko sipai dolrangni so·ote galani ja·man Meghalaya, Nagaland aro Mizoram a·dokni chief minister-rangde AFSPA-ko ra·galchina dabitokengani gimin chinga kusi ong·a. Salgro salaramni gipin chief minister-rangkoba apsan daken ia AFSPA-ko ra·galpilchina gita ku·rang on·aniko chinga nangnikenga,” ine Bhattacharya aganaha.
Salgro salaram a·dokrangoniko ia ka·namgijagipa AFSPA-ko ra·galpilkujaskal NESO jingjengataniko dontongjawa ineba NESO-ni adviser parakataha.
Salgro salaram a·dokrangoniko AFSPA-ko ra·galpilchina NESO dabie jingjengata
Date:
Share post:
