GHADC-o Congress dolni sak 11 MDC-rang, Trinamool Congress-o napgopanga

TURA: Meghalaya a·doko Indian National Congress (INC)-ni sak 12 MLA-rang ong·kate, All India Trinamool Congress (TMC)-o napangani ja·man Meghalaya a·doko TMC ka·sinsin bilakrorobaengahaon, Garo Hills Autonomous District Council (GHADC)-oba Congress dolni sak 11 MDC-rang, TMC-o napgopangaha aro uandaken GHADC-ni itihaso skanggipa changna Congress dol chu·gimik bon·atsrangako man·aha.
Iana skang, Budbar salosan Congress dolni chadambe dolko dilgiparangba bang·batan TMC-o napangtokahachim aro Bristibar saloba GHADC-ni sak 11 Congress MDC-rang TMC-o napna gita North Garo Hills a·jani Resubelpara-ona re·angtokaha.
GHADC-ni sak 11 MDC-rangko TMC-ona rimchaksona gita a·dokni gitcham chief minister aro TMC-ni gital dilgipa Mukul Sangma, Resubelpara-o jinma tom·bimonganiko ong·atangaha aro ia tom·bimonganio Congress dolna kam ka·enggipa manderangoni bang·batan bakko ra·angtokaha.
“BJP aro NPP-ko warachakna gita Congress dol bilgriaha aro Trinamool Congress dolan nambatgipa ong·enga ine nikenba chinga Congress dolni pilak MDC-rangan Congress doloni ong·kate TMC-o napskaengaha,” ine Williamnagar-ni Congress MDC Alphonsus R Marak, Bristibar salo kobor ra·timgiparangna parakataha.
Bristibar salo, Congress doloni ong·kate TMC-o napanggipa MDC-rangara Alphonsus Marak baksana, Boldamgre-ni MDC Stevie Marak, Balachanda-ni MDC Agassi Marak, Dengnakpara-ni MDC aro Congress dolni gitcham dilgipa Zenith Sangma-ni jikgipa Sadhiarani M Sangma, Kharkutta-ni MDC Cherak W Momin, Damas-ni MDC Perdinand D Shira, Betasing-ni MDC Sonjoy Koch, Samandagre-ni MDC Lahitson M Sangma, Amongpara-ni MDC Nehru D Sangma aro Rongrong-ni MDC Rinaldo K Sangma ong·a.
Shyamnagar-ni Congress MDC Habibuz Zaman, Bristibar salo an·tangni degipa sanna nange Resubelpara-ona sokbana man·jaha indiba ua ja·mano TMC-o napskagen ine ku·rachakaniko on·ataha.
Ia bilsini GHADC election-o Congress dol, dam 12 seat-rangko chena man·ahachim indiba Congress MDC-rangoni Batabari-ni MDC Ashahel D Shira-de adita salrangna skang ong·atanggipa Rajabala by-election-o Congress dolni tikitko man·jani gimin October jaon Congress doloni ong·kate United Democratic Party (UDP)-o napangskaahachim.