TURA: Garo Hills-ni B Mahal jolrango songdongenggipa manderang baksa agangrikchenggija IRBN camp-ko aro Solar Park-ko kulina miksongan baksana ia biapko Israel a·songni company-na gama ge·anirangko dakna palna miksongengani gimin re·anggipa December-ni 6 tariko ‘Save B Mahal’ committee tom·e chanchirimangenba, Garo Hills Autonomous District Council (GHADC)-ni kosako Meghalaya High Court-na ijahar ka·na tika ka·angaha ine Garoland State Movement Committee (GSMC) Pedaldoba regional unit-ni chairman Rimjen Ch Sangma u·iataha.
Sangma-ni u·iatani gitade, B Mahal-ni ning·o ga·akgipa biaprango IRBN camp baksana Solar park-ko kulina aro ia biaprango gama ge·anirangko dakna gita Israel a·songni company-na palna miksonge, GHADC-ni chief executive membor (CEM) Benedic Marak, One Time Settlement-ko dakna aro nokdangprako bigha gni a·ana gong 40,000/- tangkarangko gamchina aganengachim.
Indake ong·engon, B Mahal-o songdongenggipa manderangni kosako iandakgipa ja·kuko de·aniara Indian Constitution-ni Article 14-ko pe·ani gita ong·enga ine Sangma parakatenba, iani bidingo uamang Meghalaya High Court-o ijahar ka·na gita tik ka·angaha ine parakataha.
