SHILLONG: Garo Hills Autonomous District Council (GHADC)-o Congress dolni sak 11 MDC-rang All India Trinamool Congress (AITC)-ona napgopangani ja·man, ian maming jagokman·ani katta ong·ja maina Garo Hills-o Congress dolni bang·bata dilgiparangan AITC-o napanggen ine uamang ka·dongsoengachim ine Sukrobar salo, Meghalaya Pradesh Congress Committee (MPCC)-ni president aro Shillong-ni Lok Sabha MP Vincent H Pala parakataha.
“Ia obosta ong·telgen inen chinga ma·sisoengachim aro uamangni iandake ja·ku de·aniara chingna maming jagokna nangani katta ong·ja,” ine Pala parakataha.
Congress-oni ong·kate AITC-o napanggipa MDC-rangoni bang·batan Congress-oni katgipa MLA-rang baksa bak donggipa membor-rangsa ong·achim ine janapatengon, iandakgipa obosta ong·gen ine uamang ma·sisoani giminan Meghalaya a·doko chadamberangko aro gipinrangkoba gital dake rimnapna a·bachengaha ine MPCC-ni president parakataha.
“Ian Garo Hills-ni chadamberangna politics-ni kamko ka·na namgipa chol ong·enga. Anga Garo Hills-ni bang·a dilgiparang baksa agangrikmanaha aro ian chadamberangna namgipa chol ong·engani gimin MDC-rangni ong·katanichi chingna maming gimaani dongjawa,” ine Pala aganaha.
Meghalaya a·doko aro mongsongbate Garo Hills-o Congress dol chu·gimik bon·srangaha ine manderangni aganenggipani bidingo janapatengon, Congress dolde pangnan dongaigen aro ian skanggipa chang ong·ja ine MPCC-ni president parakataha.
“PA Sangma-ni Congress-ko watangani somoioba Congress bon·gnok ine manderang agantokachim indiba Congress dongkuaia. 2018 bilsio Prestone Tynsong aro gipin dilgiparangni wate katangoba Congress bon·gnok ine manderang agantokachim indiba chinga da·onan dongkuenga. Kakketko agangenchimode ia chango chinga skangona bate bilakbataha,” ine Pala aganaha.
