TURA: East Garo Hills a·jao donggipa Songsak police station aro Dagal OGC-ni police-rang, dakait dakgipa mande sakgittamko Sukrobar salo, Songkama songoniko rim·na man·aha.
Koborko on·ani gitade, East Garo Hills a·jani Songkama song gita dakanggipa ramao dakait dakgipa sakbonga manderang, ia rama gita re·ruraenggipa gipin jat manderangko champengsoenba, uamangni gamchatgipa gam-jinrangko ra·seke ra·engachim.
Iani bidingo koborko man·soa bakan Songsak police station aro Dagal OGC-ni police-rang, ua biapona re·angenba dos dakgipa manderangoni sakgittamko rim·na man·aha.
Rim·ako man·gipa manderangni bimingrangara Nengman G Momin, Sengkush G Momin aro Bulbirt B Momin ong·achim aro uamangoni sakgnide Gabil Bisa Rongmil-oni ong·achim ine police-rang u·iataha.
Ia manderang, Songkama songni andalgipa ramao dongsoenba gipin biaprangoni re·baenggipa manderangko dakait daksoengachim indiba police-rang bakan ua biapona sokbae uamangoni sakgittamkode rim·na man·aha. Dakait dakgipa manderangoni sakgnide, andalgipa aro buringgrip dakgipani kate jokangna man·aha ineba police-rang u·iataha.
“Rim·a man·gipa manderangko sing·sandiangkuna gita chinga Songsak police station-ona rim·baaha. Adita salrangna skangsan ia apsan jolon re·ruraenggipa manderangko dakait dake ra·ahachim aro chinga ia apsan manderangkon chanchichipenga,” ine East Garo Hills a·jani SP BA Sangma parakataha.
