SHILLONG: AITC, Congress-ni MLA aro MDC-rangko an·tangona salangna chu·sokgenchimoba election-o susaaniara namen dingtanga ine Nationalist People’s Party (NPP)-ni koborna ku·wattimgipa James PK Sangna aganaha.
Uandake kobor ra·timgiparang baksa agangrikmitingo sing·anirangna aganchakmitingo, “Congress-de Garo Hills-o dongsrangjaha, party-ni MLA aro MDC-rang AITC aro UDP-ona jitskaha” ine aganaha.
“Indiba gitcham party-ni bon·angani gimin mamingkoba aganjawa, maina politics-ara bil gnanggipa ong·a, uni gimin sakgipinko gimagen ine agansoaniara gisik gri gita ong·gen, ine NPP national spokesperson aganaha.
Minggipin NPP, gipin party-skarangni gimin jajrengna sikja. Chingni party-ni miksonganikosa mikkango done re·mikkangna jotton ka·a, party-ko bilakatna apsan ong·e kam ka·toka. Uandake Garo Hills-ni political obostako niatgenchimode chingna namgni ong·skaa. Indiba chinga party-tangni kam ka·ani bewalrangko olgrokatjawa, party-ko bikatna kam ka·angkugen maina election sepangbaengjok, ine Sangma aganaha.
Indake ong·engon gitcham CLP dilgipa Dr. Mukul Sangma-ni party-oni ong·katahani gimin NPP, Congress baksa kam ka·na chanchianirang dongama ine sing·ona, Sangma indine aganchakaha, “da·omitingo party-na iandakgipa kattarango chanchina nangani somoio ong·kuja.”
Uandake AFSPA-ko ra·galna dabiani bidingo indine aganaha, “chingni party a·bachengonin AFSPA-ko ra·galna dabianiko on·paenga, mijaomangmang Nagaland-o a·sel ong·ani giminsa Act-ko ra·galna dabienga ine ong·ja.
