SHILLONG: India sorkarini ra·gatgipa Citizenship (Amendment) Act (CAA) 2019-ko ra·galpilchina gita dabie, North East Students Organisation (NESO)-ni ning·o chatro chatrirang, re·anggipa Sonibar salo, salgro salaramni dingtang dingtang biaprango jingjengataniko dakangaha.
CAA-ko 2019 bilsini December 9 tariko Lok Sabha-o pass ka·e salgnini ja·man Rajya Sabha-oba ra·chakangaha aro uandaken ia CAA Bill-ko India a·songni President, 2019 bilsini December 12 tariko niamona ra·gatatahachim.
Indake ong·engon, ia CAA-ko ra·gataoni bilsigni gapengahani gimin Sonibar salo chatro chatrirang, Meghalaya a·dokoba banner-rangko aro gisim nisanrangko ra·bite, a·dokni dingtang dingtang biaprango jingjengatangtaiaha.
“Salgro salaram a·dokrango songdongenggipa manderangko ma·mong sorkarini onchepna jotton ka·aniko jegalna gita chinga ia jingjengataniko dakangaha. Ia CAA-ko salgro salaram jol gimikon manderang jegaltokahaoba bilsignina skang ma·mong sorkari ra·gatdrae on·aha. Uni giminsa chinga ia salko andalgipa sal ine mesokna ia jingjengataniko dakaha,” ine Sonibar salo, NESO-ni chairman Samuel Jyrwa parakataha.
Salgro salaram a·dokrango songdongenggipa manderang ia CAA-ko maming dakeba ra·chakna man·jawa ine ian India sorkarina mesokani ong·enga ineba ua aganaha.
Mikkangchiba NESO-ni membor-rang apsan chanchirimenba, CAA-ko jegalna gita jingjengatanirangko dakangkugen ineba Jyrwa parakataha.
