TURA: Garo Hills Autonomous District Council (GHADC)-o NPP-chi dilenggipa Executive Committee-ni pass ka·daldalgipa Trading for Non-Tribals (TNT) Bill-ko ra·chakkujachina gita Tura-ni BJP MDC Bernard N Marak, Meghalaya a·dokni Governor Satya Pal Malik-ko didiataha.
Iani bidingo a·dokni Governor-na sedoatengon, bading chiwalgiparang aro MDC-rang baksa agangrikchenggijasa NPP-chi dilenggipa EC, TNT licence-ni damko bariatna gita pass ka·aha ine Tura-ni MDC talataniko on·angenba, ia Bill-ko ra·chakjachina gita a·dokni Governor-ko didiataha.
“Ia sal somoirango COVID-19 sajinmani a·sel bading chiwale cha·enggipa manderang neng·nikanirangko chagrongna nangtokengon, TNT-ni kajinako gong 1000-oni gong 5000-ona aro mitamkode gong 10,000-ona kingking bariataha. Indita kajinako kangal cholgri ong·e bading chiwale cha·paenggipa manderangde gamna man·pajawani gimin manderangni namgnina chanchie ia Bill-ko dontongatchina anga mol·molenga,” ine Marak parakataha.
Governor-ni ra·chakani grian GHADC-o ia gital kajinarangko ra·na a·bachengengaha ineba Tura-ni MDC matnangataha.
“Ia Bill-ko ra·chakna skangan bading chiwalgiparangoniko ia gital tarigimin kajinarangko ra·engaha. Ia bill-ara mitam bading chiwalgiparangoniko changgittam bate kajina ra·na aro dal·dalgipa company-rangoniko komibate ra·na miksonge ra·gatenggipa bill-sa ong·enga,” ine Tura-ni MDC talatangenba, GHADC-o GST-ko ra·gatani gimin Executive Committee-o chanchirimahachim indiba ia Bill-ko NPP-chi dilenggipa Executive Committee pass ka·drana jotton ka·enga ine parakataha.
Gital kajinarangko tarina skang gipin jat bading chiwalgiparangoniko ra·gipa kajinarangkoba gitcham governor-rang ra·chakkujachim ineba Marak parakataha.
“GHADC-ni dilgiparang, Constitution-o on·gimin niamrangko pe·e an·tangtangni skani gitasa kajinarangko ra·enga aro ian bilko jakkalsretani gita ong·engani gimin GHADC-o iandake skatang kajina ra·aniko champengna nangenga,” ine Tura-ni MDC parakataha.
