SHILLONG: Meghalaya a·doko niam gri bol den·gipa aro bol badingenggipa manderangko Forest department nie dongchajawa ine Sonibar salo a·dokni Forest & Environment Minister James Sangma talatangenba, iandakgipa manderangni kosako uni department, rakgipa ja·kurangko de·gen ine ku·rachakaniko on·angaha.
Garo Hills aro West Khasi Hills a·jarango skatang bolrangko den·e palsukatanirang batroroengani gimin Sangma, ia kattarangko aganaha.
“Niam gri bol den·gipa aro bol badingenggipa manderangko rim·a man·genchimode chinga uandakgipa manderangna rakgipa sastirangko on·gen,” ine Forest & Environment Minister aganaha.
Meghalaya a·doko niam gri bolrangko den·ani aro bol badinganirang batroroengani gimin adita salrangna skangsan, State Programe Implementation & Monitoring Committee-ni chairman aro Gambegre-ni MLA Saleng Sangma, National Green Tribunal aro a·dok sorkariko mikrakbate kam ka·china didiangahachim ine nikna man·a.
“Bolrangko niam gri den·e palsrukasan ong·aigija an·ching Nongstoin aro Mawsynram gita dakgipa jolrangchi re·anggenchimode ia jolrango porongrong ong·anirangkosa an·chingna nikna man·engaha aro mikkangchide haida ia biaprang a·gisi pil·naba dongaha,” ine Sangma aganahachim.