TURA: All Garo Hills Joint Action Committee (AGHJAC)-ni dingtang dingtang dabianirangko North Eastern Hill University (NEHU)-ni dilgiparang knachakjaengani gimin ia committee-ni ning·o donggipa dingtang dingtang dolrang, Sombar saloni NEHU Tura campus-o kam ka·aniko champengna a·bachengataha.
Ia jingjengataniko dakanio AGHJAC-ni convenor Balkarin Ch Marak, kobor ra·timgipa manderang baksa agangrikengon, NEHU Tura campus-o namdapatna nanganirang bang·en dongkuengani gimin uamang ru·uta somoirangna skangan Shillong-o donggipa NEHU-ni dilgiparangna sedoatmanahachim indiba da·onan uamangni dabianirangko chu·sokate on·na gisik nangjaengani giminsa uamang NEHU Tura campus-ko picketing ka·na gita draatako man·aha ine parakataha.
Marak-ni parakatani gitade, NEHU Tura campus-ni pro-vice chancellor-na Tribal-rangoniko songchina, Tura campus-o A·chik aro Tribal chatro chatrirangna biaprangko on·chengchina, contractual basis kam ka·enggiparangko regularise ka·china, hostel, quarter aro uandakgipa building-rangko chu·onga gita rike on·china aro chatro chatrirangna namgni ong·nagipa gipin subject-rangkoba Tura campus-o a·bachengatchina gita NGO-rang dabiengachim.
Indake ong·engon, adita somoirangna skang NGO-rang baksa tom·e agangrikanio NEHU-ni vice chancellor, an·tangni ku·rachakaniko chu·sokate on·chipjaengani giminsa Tura campus-ko NGO-rang picketing ka·e jingjengatna nangao ga·akengaha ine AGHJAC-ni sakgipin dilgipa aro GSU-CEC (Interim)-ni president Zikku Balgra N Marak parakatskaaha.
“NEHU-ni vice chancellor-ko chingni gronge agangrikani somoio ua chingko gronge agangriktaina aro chingni dabianirangko chu·sokatna ku·rachakahachim indiba da·alonan uni ku·rachakanirang chu·sokgipa ong·chipkujaenga. Tura-o NEHU campus namroroani dongjaode Garo Hills-ni chatro chatrirang, lekka poranio ja·manchakaigen aro iani giminsa chinga da·alo ia ja·kuko de·e jingjengataniko dakenga,” ine Marak parakataha.
Uamangni dabianiko knachakjaskal uamang jingjengataniko dontongjawa ineba Marak, mikrakataniko on·angaha.
