SHILLONG: Re·anggipa bilsio ma·mong sorkarini ra·chakgimin gital Education Policy-ko Meghalaya a·dokoba ka·sine ra·gatna a·bachengengaha.
Skulrango aro mongsongbate chubata gadangrango lekka pora on·ani bewalko nambatatna gita ia gital Education Policy-ko ma·mong sorkari ra·chakahachim aro bilsi 34 ong·gipa gitcham niamrangni pal ia gital niamko ra·gataniara India a·songoba bida budi on·aniko bilakbatatna ja·ku de·ani ong·gen ine official-rang aganaha.
Education official saksani parakatani gitade, da·o dipet ia gital Education Policy-ko chu·gimik a·bachengna man·kujagenchimoba ka·sinsin jedakeba ia gital niamko ra·gatna nangaon ga·aktelenga.
Ia gital Education Policy-ko ra·gatna gita sorkari, dingtang dingtang committee aro kam ka·gipa dolrangko songaha ineba Education official parakataha.
Ia gital Education Policy-ko 2030 bilsini gisepon chu·gimik ra·gatna nangenga aro Meghalaya sorkariba ia gital niamko dongimin somoina skangan chu·gimik ra·gatna ka·dongenga ineba official aganaha.
Meghalaya a·doko aro mongsongbate songadam nokadamrango skul nokrangni obostarang namsrangjani gimin sing·on, skul nokrango gadang gadang dake sorkari, namdapatengaha aro ia bilsini gisepon dam 200 gital skul nokrangko rikengaha aro mitamrangde matchotangengaha ine official parakataha.
Ia gital Education Policy-o dongimin niam gitade, da·o medical aro law college-rangna agrede pilak higher education institute-rangkon regulator ge·sanchi chalaignok aro board porikkarangkoba da·o nambate ong·atna man·gnok.
Skul curriculum-o 10+2 rokom dongjawaha aro 5+3+3+4 rokomko ja·rikskagnok aro ian bilsi 3-oni 8-ona, 8-oni 11-ona, 11-oni 14-ona aro bilsi 14-oni bilsi 18-ona ong·gen ine official-rang parakataha.