TURA: Adita salrangna skang, Garoland State Movement Committee (GSMC) dolni gita rongtalatani program-ko Tura Super Market-o ong·atangaha aro ia program-ko ong·atanio GHADC-ni MDC sakgni, chong·motan Tura-ni MDC Bernard N Marak aro GHADC-ni Deputy Chief Executive Membor Nikman Ch Marak-ba bakko ra·angaha.
Ia program-ko ong·atanio MDC sakgnian jinmana aganprakangengon, ia program-ko ong·atahani gimin GSMC-ko mittelpilangenba, sorkari ba NGO-rangni iandakgipa program-rangko ong·atanina senge dongaigija an·tangtangba rongtal an·talanirangko dakjringna nanga ine program-o bak ra·gipa manderangko didiangaha.
Manderangni bazar anti cha·gipa biaprangkosan ong·aigija an·tangtangni dongchakenggipa biaprangkoba salantian rongtalatjringchina gitaba uamang, Garo Hills-o songdongenggipa mande sakantikon didiangaha.
Ia program-ko ong·atanio All Garo Hills Joint Action Committee (AGHJAC)-ni dilgiparang, chong·motan Balkarin Ch Marak aro Roger Benny A Sangma baksana Williamnagar-oni GSMC-ni me·chik dolba bakko ra·angaha.
