SHILLONG: Assam aro Meghalaya a·dok damgnini simarango meligrikna man·jaenggipa biaprangoni damdok biaprangko skanggipa bako namatna gita a·dok damgnini sorkarirang ja·kuko de·engon, gipin damdok biaprangkoba namatna gita ta·raken ja·kurangko de·china gita Hill State People’s Democratic Party (HSPDP), Meghalaya aro Assam sorkarirangko didiangaha.
A·dok damgnini simarango meligrikna man·jaenggipa biaprangoni obosta namkalgipa damdok biaprangko a·dok damgnini sorkarirang skanggipa bako namatchengna miksonge kamko ka·engachim indiba gipin damdok biaprangan kenchakna nangbatenggipa aro manderangni neng·nikanirangko man·batenggipa biaprang ong·enga ine HSPDP dol, ia damdok biaprangkoba namatna gita ta·raken ja·kuko de·china Assam aro Meghalaya sorkarirangko didiangaha.
Ia gipin damdok biaprangoni Langpih, Block I aro Block II-koba man·chapachim.
“Langpih-kon namatna gita rakbegipa kam ong·gen. Indiba a·dok damgnini chief minister-rang, Langpih-ona re·ange niemanahani gimin ia jolrangko namatna gita mikkang bilsio seng·gnangan kamrangko ka·na nangenga,” ine HSPDP-ni president KP Pangniang parakataha.
A·dok damgnini simarango meligrikgijaniko bilsi 49 batpilengahaoba namatna man·kujaengoba da·o ia meligrikgijanirangko namatna man·gnok ineba Pangniang, an·tangni ka·dongchakenganiko parakataha.
“A·dok damgnini simarango meligrikgijanirangko an·tangtang namatchina gita ma·mong sorkariba a·dok damgnini sorkarirangna ge·etaniko on·manahani gimin ian namgipa chin ong·enga maina ia meligrikgijaniko ta·raken namatna nangenga ine ma·mong sorkariba ma·siaha,” ine HSPDP-ni president aganaha.
A·dok damgnini simarango meligrikgijaniko a·dok damgnini sorkarirang, jolko dilenggiparang aro a·dok damgnini simarango songdongenggipa manderangni bakrimanichi aro meli nangrime kam ka·anichisa namatna man·gen ineba ua aganaha.
“A·dok damgnini simarango meligrikna man·jaenggipa dam 12 biaprangko bilsisani gisepon namatna man·gen ine anga ka·dongenga,” ine Pangniang parakataha.
