TURA: Nokrek a·bri ja·reko donggipa Sa·kal Aduma songo Eco Resort-ko rikna gita mijal Mongolbar salo, Meghalaya a·dokni Chief Minister Conrad Sangma, pangchakaniko songe on·angaha aro iana pangchakaniko songe on·anganio jinmana aganprakangengon, ia Eco Resort-ara salgro salaram jolo nambatsranggipa tourist resort-rangoni damsa ong·gen ine ku·rachakaniko on·angaha.
Chief Minister-ni parakatani gitade, ia Eco Resort-na gong kror 23 tangkarangko sorkari chame donmanaha aro iana lekkani kamrangko matchottokahani gimin ia resort-ko mikkang bilsini gisepon matchotna ka·dongenga.
COVID-19 sajinmani a·sel Meghalaya a·doko tourism bon·chongdikatako man·na nangaha ine janapatengon, da·o a·doko tourism-ko tang·doatpiltaina sorkari krenge kamko ka·engaha aro iana sorkari, gong kror 700 tangkarangko JICA-oniko man·soahani gimin ia tangkarangoni gong kror 350-ko Garo Hills-na aro gong kror 350-ko Khasi Hills-na chamatmanaha ine Chief Minister parakataha.
A·dokni chiring chibisikrangko ripinge rakkiangna nangengani gimin janapangengon, iana a·dok sorkari, Water Reservoir Project-ko ra·gatna sienga ine Chief Minister parakataha.
Ia eco resort-na pangchakaniko songe on·angani somoio Chief Minister-ni Adviser Thomas A Sangma-ba dongpae jinmana aganprakangengon, ia resort-o information centre-ba donggen aro ian gipin biaprangoni re·baenggipa tourist-rangna A·chik a·songni gimin skie ra·ani centre gita ong·gen ine parakangenba, ia jolrango dingtang dingtang scheme-rangko ra·gate on·china Agriculture aro Veterinary department-rangko didiangaha.
Ia tom·anio dongpae bakko ra·anggipa gipin manderangara, Meghalaya sorkarini Chief Whip Marcuise Marak, Siju-Rongara-ni MLA Rakkam A Sangma, West Garo Hills a·jani Deputy Commissioner Ram Singh, songni nokni dilgiparang aro gipinrang ong·a.
Salgro salaram jolo nambatsranggipa Resort-ko Sa·kal Aduma songo rikgen: Conrad
Date:
Share post:
