SHILLONG: Meghalaya aro Assam a·dokni simarango meligrikgijanirangko namatna gita a·dok damgnini sorkarirang kamko ka·engon, ia ja·kuko de·anio songo noko jatko dilenggiparang aro simarango songdongenggipa manderangni nangnikanirangkoba ra·china gita Budbar salo Khasi Students Union (KSU) aro gipin dolrang, Meghalaya a·dokni Chief Minister Conrad Sangma aro sorkarini gipin dilgiparangko grongenba didiangaha.
Budbar salo, KHADC-ni border committee report-ko Chief Minister-na on·angani ja·man, KSU aro gipin dolrangba Chief Minister-ko gronge, ia obostarangni gimin agangrikangaha.
KSU-ni general secretary Donald V Thapa-ni kobor ra·timgiparangna parakatani gitade, NGO-rang baksa tom·e chanchirimanio sorkari, meligrikna man·jaenggipa damdok biaprangko namatchengna ja·ku de·ani bidingo agangrikangaha.
“Simarango meligrikgijaniko namatna ja·ku de·anio songni nokni dilgiparang aro simarango songdongenggipa manderang baksaba agangrike, uamangni nangnikanirangko ra·china chinga aganaha aro chingni agananiko sorkari ra·chakna ku·rachakaha,” ine Thabah aganaha.
Thabah-ni parakatani gitade, Assam sorkari baksa simako salengon, Hill State-ni miksonganiko ra·esa salchina gitaba NGO-rang, a·dokni Chief Minister-ko aganaha.
“Meghalaya a·dokko bikotchengani somoio, ku·aganani, jatni ong·baani, jatni daka rikani, jatni niam aro uandakgipa obostarangko niesa bikotaha aro maibakae da·o Khasi Hills ba Garo Hills-ni a·arang Assam-o napanggenchimode Hill State-ni miksonganian ong·jawaha,” ine KSU-ni general secretary aganaha.
Khasi ba A·chik songrang Assam-o napanggenchimode, ia songni manderangde Schedule Tribe (ST) gadangko gimaatgnok aro songko nokko dilna gita cholrangko man·jawaha ineba Thabah aganaha.
Photo: Assam aro Meghalaya a·dokni simarango meligrikgijaniko namatna kam ka·ani bidingo a·dokni Chief Minister Conrad Sangma aro gipin dilgiparang, KSU aro gipin dolrang baksa tom·e chanchirimenga.