SHILLONG: Mijal Budbar salo University of Science & Technology Meghalaya (USTM)-ni chang 7-gipa Convocation-ko ong·atangaha aro ia convocation-ko ong·atanio gimik sak 1,332 graduate ong·anggipa chatro chatrirangna degree-rangko on·angaha.
Sak 1332 chatro chatrirangoni sak 11 chatro chatrirangna Ph.D degree-ko, sak 823 chatro chatrirangna Post Graduate (PG) degree-ko aro sak 498 chatro chatrirangna Undergraduate degree-rangko on·aha.
Ia convocation-ko ong·atanio Cachar Cancer Hospital-ni Director aro Padma Shree Dr Ravi Kannan baksana USA a·songo donggipa Wright State University-ni Professor of Medicine Dr Abdul Wase-na Hon Doctorate of Science (D.Sc)-ko aro Prag News-ni Editor-in-Chief Prasanta Rajguru-na Hon Doctorate of Letters (D.Litt) degree-koba on·angaha.
Ia convocation-ko ong·atanio New Delhi IGNOU-ni Vice Chancellor Prof Nageshwar Rao, jinmana aganprakangengon, salgro salaram a·dokrangna aro India a·songni gipin biaprangnaba a·gilsakni seng·aniko nangchongmota maina mande bida budi donggenchimosa songsalni namroro silroroanina on·gilanirangko dakna man·a ine parakangaha.
Cholgri ong·gipa nokdangoni seng·gipa chatro chatrirangna indin lekka porako on·engani gimin ua USTM-ko mittelpilangjolaha.
University-o skia man·aniko songsalni namroro silroroanina jakkalchina gitaba Prof Rao, USTM-ni chatro chatrirangko didiangaha.
Ia convocation-ko ong·atanio jinmana aganprakanggipa gipin manderangara, Guwahati IIT-ni Director Dr TG Sitharam, USTM-ni Chancellor Mahbubul Hoque, USTM-ni Vice Chancellor Prof GD Sharma aro gipinrang ong·a.
Photo: USTM-ni convocation-ko ong·atanio dingtang dingtang degree-ko man·gipa chatro chatrirang, USTM aro gipin official-rang baksa jachipchangenga.