TURA: All Garo Hills Joint Action Committee (AGHJAC)-ni dingtang dingtang dabianirangko North Eastern Hill University (NEHU)-ni dilgiparang knachakjaengani gimin ia committee-ni ning·o donggipa dingtang dingtang dolrang, Sombar saloni NEHU Tura campus-o kam ka·aniko champengna a·bachengatahaon, NGO-rangni dabianirangna NEHU-ni official-rang maming aganchakaniko on·jaengani gimin Bristibar salonide bilakbate jingjengatanirangko dakangna gita tik ka·angaha.
Ia jingjengataniko dakani bidingo AGHJAC-ni convenor Balkarin Ch Marak, talataniko on·angengon, NEHU Tura campus-o namdapatna nanganirang bang·en dongkuengani gimin uamang ru·uta somoirangna skangan Shillong-o donggipa NEHU-ni dilgiparangna sedoatmanahachim indiba da·onan uamangni dabianirangko chu·sokate on·na gisik nangjaengani giminsa uamang NEHU Tura campus-ko picketing ka·na gita draatako man·aha indiba da·onan NEHU-ni official-rang, NGO-rangna maming ku·rachakaniko on·jaengani gimin Bristibar salonide NGO-rang, bilakbate jingjengatanirangko dakanggnok ine parakataha.
NEHU Tura campus-ni pro-vice chancellor-na Tribal-rangoniko songchina, Tura campus-o A·chik aro Tribal chatro chatrirangna biaprangko on·chengchina, contractual basis kam ka·enggiparangko regularise ka·china, hostel, quarter aro uandakgipa building-rangko chu·onga gita rike on·china aro chatro chatrirangna namgni ong·nagipa gipin subject-rangkoba Tura campus-o a·bachengatchina gita NGO-rang dabiengachim ine nikna man·a.
“NEHU-ni vice chancellor-ko chingni gronge agangrikani somoio ua chingko gronge agangriktaina aro chingni dabianirangko chu·sokatna ku·rachakahachim indiba da·alonan uni ku·rachakanirang chu·sokgipa ong·chipkujaenga. Tura-o NEHU campus namroroani dongjaode Garo Hills-ni chatro chatrirang, lekka poranio ja·manchakaigen aro iani giminsa chinga da·alo ia ja·kuko de·e jingjengataniko dakenga,” ine AGHJAC-ni dilgiparang parakataha.
Uamangni dabianiko knachakjaskal uamang jingjengataniko dontongjawa ineba AGHJAC-ni dilgiparang, mikrakataniko on·angaha.
Photo: Dingtang dingtang dolrangni nangrime bikotgipa All Garo Hills Joint Action Committee (AGHJAC)-ni dilgiparang, NEHU Tura Campus mikkango jingjengatenga.