TURA: 1971 bilsio Pakistan a·song baksa dakgrike Bangladesh a·songni jakgitelko man·aoni bilsi 50 gapaniko West Garo Hills a·jani Dalu jolo donggipa Kilapara War Memorial-o 100 Battalion Border Security Force (BSF) dolni gita maniangaha.
Ia salko manianio BSF Tura Sector-ni Deputy Inspector General Alok Kumar Singh, 100 Bn BSF-ni Commandant SK Guleria aro BSF-ni gipin sipairang, 1971 bilsio Pakistan a·songko warachakanio sianggipa sipairangna mande ra·pilskaaniko dakangaha.
Ia Killapara War Memorial-ara, 1971 bilsio East Pakistan sipairangni Bangladesh a·songo napdrabana gita re·baani somoio BSF sipairangni champengsoe an·tangtangni janggirangko gimaatgipa saksku BSF sipairangna mande ra·pilskaani chin gita killako songe dongipa biap ong·achim aro ia sipairangni Bangladesh a·songni jakgitelanina an·tangtangko on·kange siangahani gimin ia salo dingtangmancha ia sipairangna mande ra·pilskaaniko dakangaha.
