TURA: All Meghalaya Muster Roll Progressive Workers’ Union (AMMRPWU)-ni changgittamgipa general meeting ba tom·bimonganiko December-ni 18 tariko Asanang Multi Facility Hall-o ong·atenga ine kobor on·aha.
AMMRPWU-ni president NK Lanong-ni u·iatani gitade, re·anggipa bilsio COVID sajinmako warachakna gita lockdown-rangko ong·atani a·sel union-ni tom·bimonganiko ong·atna man·jahani gimin re·anggipa November 27 tariko union-ni dilgiparang, Shillong-o tom·e chanchirimangenba, union-ni changgittamgipa tom·bimonganiko December 18 tariko ong·atskana tik ka·angaha.
Ia tom·bimonganio Meghalaya a·dok gimikonin Muster Roll worker-rang dongpae bakko ra·anggen aro ia tom·bimonganio dingtang dingtang department-rango Muster Roll worker ong·e kam ka·enggiparangni neng·nikanirangko namatna gita jinma apsan tom·e chanchirimanggen ineba Lanong parakataha.
AMMRPWU-ni dingtang dingtang dabianirangko sorkarini knachakjaengani giminba ia tom·anio union-ni membor-rang, sorkario bilakbate dabiangna gita apsan chanchirimanggen ineba Lanong parakataha.
Muster Roll worker-rangni mongsonggipa dabianirangni gimin talatangengon, personnel & administrative reforms (B) department-ni 1996 bilsio on·gipa office memorandum-o pangchake 50% group ‘D’ post-rango muster roll-rangko kamo regularise ka·china, muster roll-rangni man·gniko jaanti on·china, kamo regularise ka·a man·kugijagipa muster roll-rangna Supreme Court-ni dongimin niam ‘Equal Pay for Equal Work’-o pangchake apsan dormahako on·china, dingtang dingtang department-ni muster roll-rangna casual leave, EPF, ESI, bonus aro uandakgiparangko on·china dabianirangan ong·achim ine AMMRPWU-ni president parakataha.
