SHILLONG: East Jaintia Hills a·jao donggipa Khliehriat C&RD Block-ko mijal Bristibar salo Wapung-ona apjitangskaaha aro ia block-ko apjitangani somoio a·dokni Chief Minister Conrad Sangma, mongsonggipa sokgipa ong·e jinmana aganprakangengon, a·doko songdongenggipa manderangni nangnikani kri block-rangko kulidape on·na gita sorkari cholrangko nigen ine parakangaha.
Khliehriat C&RD Block-ko Wapung-ona apjitanganiara Wapung jolo songdongenggipa manderangna sorkarini kamrangko aro dingtang dingtang cholrangko sepangbatatani gita ong·gnok ine janapatengon, C&RD Block-rangara songko nokko chalaina aro nirok sandina gita nangchongmotgipa chol gita ong·ani gimin je biaprangan block-rangoni chel·grikachim, uandakgipa biaprango gital block-rangko kulina sorkari cholrangko sandigen ine Chief Minister parakataha.
“A·doko songdongenggipa manderangni nangani kri a·dok sorkari, administrative block-rangko kulidape on·na cholrangko nigen. An·chingni a·doko biaprang chel·ani gimin sorkarini kamrangko man·jaenggipa bang·bea biaprang gnang aro uamang sorkarini on·enggipa dingtang dingtang cholrangko ra·na chel·bee songrena gita nangenga. Uni gimin iandakgipa biaprango sorkarini kamrangko sepangbatatna gita sorkari, gital block-rangko man·na dipet kulie on·na jotton ka·gen,” ine Sangma aganaha.
Ma·mong sorkarini ra·gate on·gipa scheme-rangko block-rang gitasa chu·sokate on·enga ine talataniko on·angengon, sorkarini ra·gate on·enggipa scheme-rangko manderangona sokatna gita block office-rangko nangchongmota ine Chief Minister parakataha.
Khliehriat C&RD Block-ko Wapung-ona apjitangskaaniara Khliehriat community health centre (CHC)-ko full fledged hospital-ona ra·dona gita chol ong·skagnok ineba ia tom·anio Chief Minister parakataha.
Ia tom·aniko ong·atanio a·dokni Chief Minister baksana a·dokni C&RD Minister Hamletson Dohling, Social Welfare Minister Kyrmen Shylla aro gipin dilgiparangba dongpae bak ra·angaha.
