TURA: East Garo Hills a·jani Rongrenggre reserve forest-o niam gri cho·gimin damdok koela a·kolrangko adita salrangna skang Forest official-rang nikenba, dape donatpiltokaha.
Koborko on·ani gitade, koela badinggipa manderang, ia Rongrenggre reserve forest-ona re·bae niam gri koelarangko bikote ra·engachim indiba ia kanggimin buringoniko niam gri koelarangko bikote ra·enga ine koborko man·soani ja·man, Forest department-ni official-rang, Williamnagar Police-ni dakchakanichi ia koela a·kolrangko dape donatpiltokna man·aha.
Batanggimin bilsirangoba ia Rongrenggre reserve-oniko ma·sina man·gijagipa manderang, niam gri koelarangko bikote ra·ahachim aro uandaken ja·mano Forest official-rang, cho·gimin koela a·kolrangko JCV-rangchi dape donatpiltokahachim. Indake ong·genchimoba da·o changsataie, koela badinggipa manderang, ia kanggimin buringona re·bae, niam gri koelarangko bikote ra·na a·bachengtaiahachim.
“Ia reserve forest-niko koela badinggiparang, niam gri koela bikotenga ine chinga ma·sienba man·a dipetde nirokengachim aro gisepode ia biaprangona re·bae niam gri cho·gimin koela a·kolrangko dappile donrongengachim. 2020 bilsimangonin ia biaprangoniko koela badinggiparang, niam gri koela bikotengani gimin chinga iandake niam gri koela bikotaniko champengna kamko ka·engachim. Indake ong·genchimoba, da·o changsataie niam gri koela badinggiparang, ia biapona re·bae koelarangko cho·taiaha aro chinga iako nike koela a·kolrangko dape donatpiltokaha,” ine Forest official-rang parakataha.
Mikkangchiba uamang, ia jolrango niam gri koela bikotaniko mikrakbate nirokanggen ineba Forest official parakataha.
