BOKO: Niam gri koela salgipa truck garirang Sukrobar pringwalni Boko-Hahim-Riangdo rama gita Boko songona napbaaha ine jolo songdongenggipa manderang parakataha.
Kobor on·timgipa manderangni u·iatani gitade, ia koela salgipa truck garirango nangchongmotgipa lekkarang dongjachim aro ia garirango dongimin niamna bate koelarangko salbaahachim.
“Ia truck garirang, West Khasi Hills a·jani Shallang-oniko niam gri koelarangko sale Boko-ona re·napbaaha. Ia garirango mohor su·gipa challan-rang dongja aro GST-ni invoice aro ewaybill-rangba dongjachim. Chingni kobor man·soani gitade, niam gri koela salbaenggipa garirang, Assam gita re·bana gong 1,80,000-ko challan donggiparangna aro agent-rangna on·aha. Chingni chanchichipani gitade niam gri koelarangko badinganio Assam aro Meghalaya a·dokni politician-rangan jak dongna nanga,” ine kobor on·timgiparang parakataha.
Ia truck garirangni on·enggipa gong lak 1,80,000-ko Assam aro Meghalaya a·dok gita salbana police aro administration-na on·enga ineba kobor on·timgiparang matnangataha.
Iani bidingo Kamrup-ni deputy commissioner Kailash Kartik N-o sing·sandiaton, da·o dipet ua iani bidingo maming badi ka·anirangko man·soa dongkuja indiba ua am·sandie nanga gita ja·kurangko de·gen ine parakataha.
Challan gri koelarangko salengani gimin Mawshynrut-ni MLA Gigur Myrthong-o sing·sandiatskaon, ua iani bidingo mamingkoba aganchakjaha aro dongimin niamna bate koela salanikoba ua Transport department-ni jakosa ong·a ine aganchakaiaha ineba kobor on·timgiparang parakataha.
Niam gri koela salgipa truck garirang, Meghalaya a·dokoni Assam a·doko donggipa Hahim police outpost gitan Assam-ona napbaaha ineba kobor on·timgiparang parakataha.
