TURA: Spark Hills Centre-ni bilsisa gapaniko maniani bak gita adita salrangna skang, Bakdil dolni gita program-ko game ge·e cha·giparangna, self help group (SHG)-rangna aro producers group (PG)-ni membor-rangna East Garo Hills a·jani Songsak-o ong·atangaha.
Ia program-ko ong·atanio Labour-ni Deputy Commissioner MN Sangma, Horticulture Officer Siljong Sangma, FSSAI-ni Assistant Commissioner Tangme Ch Marak, Fishery Officer Challang Marak, Soil & Water Conservation Officer Monoronjon Momin aro dingtang dingtang department-ni officer-rangba dongpae bak ra·angaha.
Ia program-ko ong·atanio Songsak Block-o donggipa FOCUS program-ni centre manager Sr Stella Michael, jinmana aganprakengon, Spark Hills Centre aro FOCUS program-ni kan·dikgipa report-ko on·angaha.
Ia Spark Hills Centre-ara re·anggipa bilsini November jao Meghalaya sorkarini songe on·gipa skanggipa PRIME Hub ong·achim aro ia bilsisani gisepon ia centre, dingtang dingtang training program-rang, jekai me·gimu ge·ani, ro·ongni kamrang aro uandakgipa training program-rangko game ge·e cha·giparangna ong·atangahachim.
Ia centre-o medical dispensary-ba gnang aro ia dispensary-o da·o dipet me·chik sakgniko an·pakatna man·aha aro malaria sagiparangko sanne banne on·na gita man·aha.
Ia program-ko ong·atanio Labour-ni Deputy Commissioner MN Sangma aro FSSAI-ni Assistant Commissioner Tangme Ch Marak-ba tom·anio bak ra·giparangna aganprakangaha.