SHILLONG: Opposition-o donggipa Congress, a·dokni manderangni namgnina akm ka·na miksonganio National People’s Party-ni dilenggipa Democratic Alliance sorkari baksa meli nangrime kam ka·na tik ka·aha. Jekon Chief Minister Conrad Sangma, namnike ra·chakataha.
Meghalaya-ni gitcham party NPP baksa barime kam ka·na ja·ku de·aniara MDA-o bakrimgipa NPP aro BJP baksa meligrike kam ka·ani ong·gen.
Congress, uamangni chanchianiko Chief Minister Conrad K Sangma-na Sukrobar salo u·iataha.
“Congress Legislature Party tom·anio, adokni manderangni namgnina kam ka·na nangchongmotgipa agenda-ni gimin chanchibewalaniko dakangaha, ine CLP dilgipa Ampareen Lyngdoh aganaha.
Jeon Congress-ni sakbri MLA-rang- Process T Sawkmie, Mohendro Rapsang, Kimfa S Marbaniang aro Mayrolborn Syiem- uamangba tom·anio bak ra·angpaaha.
A·dokko namdapatna aro a·dokni manderangni namgniko gisiko done chanchion MDA baksa meligrike kam ka·na miksongaha. Mikkangchi Inner Line Permit-ko ra·gatanio aro Citizenship Amendment Act-ni bidingrango apsan kam ka·anggen.
Meghalaya-ni politics-o All India Trinamool Congress-ni re·bae sak 12 Congress MLA, sak 11 GHADC MDC-rangko ra·seke katani a·selsa Congress, NPP-ni dilenggipa MDA baksa bakrimna chanchiahama, iani gimin talede agana man·ja.
AITC aro Congress dolgnisa apsan ong·e BJP-ko ga·akatna bakrime kam ka·angna kraachim, indiba bobil dolsako apsan ong·e dakgrikchakani palo an·tangtangsa dakgrike dongenga. Uni gimin chinga darangniba bobil ong·jaha aro darangni ning·o nokkol donge kam ka·gipa ong·jaha. Chinga an·tangtangni u·ianio changa-sapanio kam ka·gipa ong·a aro mikkangchi nambate kam ka·angna sorkari baksa bakrimna jajaani dongjawa, ineba Ampareen aganaha.
Indake ong·engon Chief Minister, Congress-ni sorkari baksa meli nangrime kam ka·na tik ka·aniko namnike de·mittelataha.
CLP baksa agangrika ja·man kobor ra·timgiparangna parakatengon, Chief Minister indine aganataha, “Congress, a·dokni manderangni namgnina kam ka·na miksonganio sorkari baksa melie kam ka·na sikaniko parakaha. Iana uamangko mittelna sika.”
