SHILLONG: Congress-ni NPP baksa bakrimna kam ka·na parakataniko AITC matnangatenba Sonibar salo indine aganaha, “Congress-ni sorkari baksa bakrimna chanchianiara Indian National Congress-ni chanchiaoni bikpilgipa ong·a aro togianisa.”
Congress Legislature Party, NPP aro BJP-ni dilenggipa MDA sorkari baksa bakrimna tik ka·aha, ian chu·gimik togiani ong·a. Aro Indian National Congress-ni kam ka·ani bewaloni namen dingtanga ba bikpilgipa ong·a, ine AITC, Parliamentary Meghalaya-ni chief Mukul Sangma aganaha.
“Ian uamangni bilo dongkamna ka·oksianiko talen mesoka, a·dokni manderangni namgnina kam ka·na chanchianio NPP baksa bakrimenga ingipa tol·asa. Iarangkon nikon Meghalaya Congress-ni bilding-bildang ong·ako nikna man·enga aro uamangni jaja jiji ong·ako nikna man·enga ine Mukul Sangma, Congress-ni NPP baksa melie kam ka·na parakatani gimin ia kattarangko aganataha.
Uamangko skangan Congress-o dongani palo AITC baksa bakrimna okamahachim, uamang a·dokni manderangna dangdike on·na sikchongmota ong·ode Trinamool Congress-ona re·bana nanga. Ia biaposan an·tangtangni daitoko ra·e kam ka·na man·gen, ineba Mukul agandapaha.
