SHILLONG: Congress-oni ong·katanggipa sak 12 dilgiparang jekoba aganchina, uamangni katta dal·e ra·jaha, chinga da·ode jakgittel ong·aha darangni ning·o donge kam ka·na nangjaha ine Congress, Sonibar salo aganaha.
“Gipinrang jekoba aganchina, uamangni kattako dal·e ra·ja. Chinga da·ode an·tangtangni u·ianio kam ka·na jakgittel ong·a, camp-oni saksani aganako knae ja·rikna nangjaha, ua gitcham salrang bon·aha, rang·spena man·aha ine CLP dilgipa Ampareen Lyngdoh aganaha.
AITC, PP dilgipa Mukul Sangma-ni ‘Congress jaja jiji ong·enga’ ine aganatani gimin Lyngdoh, ia kattarangko aganchakataha.
“Chingni namnika gita aro chanchibewalaniko dake a·dokni manderangni namgnina kam ka·na ja·ku de·aha, TMC-ba ching baksa bakrimna sikode ong·aigen.”
CLP, an·tangtangni namgnina chanchigija, a·dokni manderangna dangdike on·aniko skang done kam ka·a, ineba Lyngdoh aganaha.
Congress, mni Sukrobar salo National People’s Party-ni dilenggipa Meghalaya Democratic Alliance sorkari baksa bakrime kam ka·na tik ka·aniko parakataha. Jekon Chief Minister Conrad K Sangma-ba namnike kusi ong·ako parakataha.
