TURA: Meghalaya a·doko Krismasna skangan COVID-19-na tika su·aniko matchotatna sorkari manchimanahani gimin North Garo Hills a·jaoba tika su·kugijagipa manderangko aro gnigipa pongko su·na somoi ong·enggipa manderangko su·na gita December 20 aro 21 tarikrango salgnina North Garo Hills a·jani District Administration aro Health department nangrime, special vaccination campaign-ko Bajengdoba block-ni ning·o donggipa polling station-rango ong·atenga.
Ia tika su·ani program-ko election-ni bewalo ong·atengani gimin Bajengdoba block-ni ning·o donggipa pilak polling station-rangon tikarangko su·anggen aro iana dingtangmancha tika su·gipa dolrangko polling station-rangona watatenga ine North Garo Hills a·jani official-rang u·iataha.
Je manderangan COVID-19-ni tikarangko su·e ra·kujaengachim aro jemangan gnigipa pongko su·ani ong·engahachim, uamang pilakkon an·tangtangni sepangbatgipa polling station-rangona re·ange tikarangko su·e ra·china gitaba official-rang didiataha.
Indake ong·engon, songtangtango aro joltangtango tika su·kugijagipa manderangko tika su·e ra·echina didina aro tika su·e on·enggipa dolrangna dakchakanirangko on·china gita North Garo Hills a·jani Deputy Commissioner, Bajengdoba block-ni ning·o donggipa dingtang dingtang songni nokmarang, sordarrang, VEC-ni dilgiparang aro gipin dilgiparangko didiatskaaha.