A·sak A·briko Scientific Coal Mining-na palsruka inako Nokma depante jegalata

SHILLONG: West Khasi Hills a·jani ning·o ga·akgipa Khalu Gare A·kingni Nokma an·tangni Nokma ong·aoniko watgale A·kingni Agent aro sakgipin Nokma baksa melienba mahari gimiko knaatgija Khalu Gare A·kingni ning·o donggipa A·sak A·briko Scientifically Koela Mining kulichina palsruke cha·a ine Social Media-o aro YouTube News Channel-rango jangbingbangatenganiara kakket ong·ja ine Khalu Gare A·kingni Nokmani depante Zimichryst G. Marak tol·e jangatenggipa manderangni kosako raken jegalataha.
Marak-ni koborna agan-talatani gitade, Khalu Gare A·kingni Nokma kamtangko watja aro maharini kosako togie cha·gipaba ong·taijachim. Maharini gisepo badiaba manderang saksa sakgni mate dakgipa uko (Nokmako) tol·e matnangani ja·pangara; batanggimin June aro July jarangni gisepo, Nokmani demechik (Nokrom) saa bilongani somoio jerangan Scientifically Koela Mining kulichina gita Khalu Gare A·kingni ning·o donggipa A·sak A·bri ja·retni Koelako da·ona kingkingba on·a jechakachim, uamangni antio chang gittamrang Nokmani nokona meeting-na (tom·na) re·barokrokako nokchaksojani a·selsa uamang Nokmako tol·e matnangna a·bachengaha, Maraka aganaha.
Minggipin gita, Agent aro sakgipin Nokma baksa melie Khalu Gare Mahari gimiko u·iatgija an·tangtangni man·gnina srik srik pale cha·a ine matnanganina talatengon, Scientific Koela Mining kulichina gita A·sak A·brini koelako Agent aro Nokmarang an·tangari palsruke cha·ja. Indiba, batanggimin July 21, 2021 tariko Khalu Nokma, Shri, Welson Sangma-ni noko Khalu songo atchikapgipa a·kingni Agent, Nokmarang aro Gare Chra-Nokchik aro mosa boningrang baksa tom·bimonge chanchirimenba Khalu Gare Mahari gimik Resolution-rangko pas ka·gipao pangchake, mikkangchi chasongni chasongna dedrang-su·drangna janggi tangani chol ra·baan baksa, uamangni janggi tangani gadangko ra·doatna miksonganio aro songko nokko, bagan bariko, chiring-chibisik aro manderang gimikko naljoke rakkian baksa mahari gimikna namgniko ra·bana man·a gita mahari gimik ku·cholsan ong·e Khalu Gare A·kingo donggipa A·sak A·bri ja·retni koelako Scientifically Mining kulichina saksa mandena on·aha.
Uan Agent, Nokmarang mangmang an·tangtangni man·gnina mikpakma nie dakade ong·ja, maina Agent aro Nokmarangna agreba, Gare Chra-nokchikrang aro maharini bak rengsiko man·pana kragipa sak 180 batpilgipa houshold (beneficiary-rang) soi ka·grimesa kosako janapgimin A·brini ning·o donggipa koelako Scientifically Mining kulichina ku·cholsan on·tokaha.
Iani gisepon je manderangan mahari baksa bakrimna sikgija (matburing mate dakgipa) sak bri ba sakbonga manderangni tol·e matnangasan ga·akaia.
Uarangna agreba, tol·e matnangenggipa manderang a·king goreo koela mining kuliode chiring-chibisik tipgnok ine jajrengenga, “indiba anga uamango sing·dona sikgenchim, chong·motan Scientist-rangni gimikko nirikkie aro porikka ra·e niani ja·mano gimik jonturang ba janggi gnanggipa matburing, chibima, aro chiring-chibisikrangko naljoke koela cho·china gita MMDR Act 1957-o donggipa niam (provision)-ko ja·rike koelako cho·e bake cha·china raiko on·mangenchimode maikai gimikni gitan naljokaniko man·jawa?”
Indide, ia manderangan Scientifically koela Mining kulichina malikna on·gimin biap ba A·brioniko niam gri koela cho·e cha·kuna miksonganiosa chol·ko am·kolamgiparang ong·a ine Marak jaksi otatenba, an·tangtangni namtelgijagipa gisikchi chanchiesa A·kingni Agent, Nokmarang aro mahari gimikko tol·e jangbingbangatenggipa manderangni kosako ru·utgijan niam gita Defamation Case ka·atskagen ineba koborna parakataha.