SHILLONG: Meghalaya a·doko Congress dolni, a·dok sorkarina dingtang dingtang kamrango chakpaaniko on·na manchianiko ma·sisrettokenga ine Sombar salo, Congress dolni dilgipa Ampareen Lyngdoh a·kangataha.
Re·anggipa Sukrobar salo, a·doko bangki dongkuenggipa Congress dolni sakbonga MLA-rang, Inner Line Permit (ILP) aro Assam a·dok baksa meligrikna man·jaenggipa simarangko namatna a·dok sorkarini kam ka·anio bakrimaniko on·pana gita ku·rachakaniko on·angahachim.
Iani ja·mano, Congress doloni ong·kate Trinamool Congress (TMC)-o napanggipa Mukul Sangma, a·doko bangki dongkuenggipa Congress dolni MLA-rang, doltangko cha·bokaha ine matnangatskaahachim.
Indake ong·engon, Congress doloni ong·kate TMC-o napanggipa MLA-rangni a·kanganiko Congress dolni dilgipa jegalatskaenba, uamang an·tangtangko opposition-ni membor-rang ine a·kangna man·jawa ine Lyngdoh parakataha.
“Meghalaya a·doko songdongenggipa manderangni namgnina chinga opposition dolni membor-rangan, mitam kamrangode sorkarina chakpaaniko on·na tik ka·enga ong·ode chingko Meghalaya Democratic Alliance (MDA)-ni bak ong·enga ine aganna gita TMC-ni dilgiparangara sawa?” ine East Shillong-ni MLA Ampareen Lyngdoh sing·doangaha.
A·dokni namgnina sorkari baksa bakrimgenchimoba, a·dokni Congress dol, BJP baksade bakrimna man·jawa ineba Lyngdoh talataniko on·angaha.
“Assembly-o BJP-ni MLA sakgnisan dongaiani gimin chinga BJP-kode gelna man·aigen aro BJP baksa bakrimna nangani katta nakatja,” ine Congress MLA aganaha.
Sorkarini dingtang dingtang scheme-rang aro program-rangko chu·sokatna gitasa Congress dolni MLA-rang, re·anggipa Sukrobar salo, a·dokni Chief Minister Conrad Sangma-ko gronge bakrimaniko on·na ku·chakaha ineba Lyngdoh parakataha.
