TURA: Mijal Sombar salo, Meghalaya a·dokni Chief Minister Conrad Sangma-ni jakchi All Garo Hills Multipurpose Cooperative Society Limited-na pangchakaniko West Garo Hills a·jani Babadam songo songe on·angaha.
Ia Cooperative Society-na pangchakaniko songe on·angani somoio North Tura-ni MLA Thomas A Sangma, Cooperative department-ni Principal Secretary GHP Raju, West Garo Hills a·jani Deputy Commissioner Ram Singh aro gipinrangba dongpae bak ra·angaha.
Ia cooperative society-na pangchakaniko songe on·anganio a·dokni Chief Minister, jinmana aganprakangengon, ia All Garo Hills Multipurpose Cooperative Society Ltd-ko gong kror 4.44 koroschi rikgen aro ianoni gong kror 3.20-kode a·dokni Cooperative department on·gen ine parakangaha.
Ia cooperative society-ko Garo Hills gimiko donggipa cooperative society-rangna dingtang dingtang cholrangko on·na gita rikenga aro iano cooperative society-rangni bosturangko tarichakani aro packaging unit-rangba donge ian dingtang dingtang dolrangni ma·manti bosturangko bazar antirangona sokate on·na dakchakani ong·gen ineba Chief Minister parakangaha.
Ia cooperative society-chi wakrangko jile cha·na, dudni bosturangko tarina aro do·orangko jile cha·na gita sorkari dakchakanirangko on·gen ineba Chief Minister parakataha.
“Game ge·e cha·enggipa manderangni namgnina sorkari, on·kange kam ka·enga aro dingtang dingtang dolrangni nangrime kam ka·anichi, wak jilani, dudni bosturangko tariani aro do·o jilani kamrangko man·chape a·dok sorkarini a·bachengatgipa dingtang dingtang kamrangko chu·sokate on·anggen,” ine Sangma aganaha.
India a·songni salgro salaram jolo donggipa a·dokrangna Babadam songo dingtangmancha gong kror 280-ni Paramedical Institute-ko kulina sienga ineba ia tom·anio Chief Minister parakataha.
Babadam-o Multipurpose Cooperative Society-na CM-ni jakchi pangchakaniko songe on·anga
Date:
Share post:
