TURA: Re·anggipa December 18 tariko West Garo Hills Bus Association (WGHBA)-ni tom·aniko ong·atangenba, association-ni dongimin niamo pangchake bilsigittamna gital executive committee-ko songtaikujaskalna adhoc committee-ko songe donangaha ine kobor on·aha.
Association-ni u·iatani gitade, WGHBA-ko baditaba bilsirangna president, vice president aro gipin membor-rang grisa chalaiengachim aro association-ko secretary saksan aro adita sak membor-rangsa chalaiengachim. Association-ko secretary ong·e chalaienggipa mande, adita salrangna skang siangna nangahani gimin association-ni membor-rang, association-ko chalaina gita adhoc committee-ko nangenga ine nikenba, ia tom·anio dingtangmancha adhoc committee-ko songe donangaha.
WGHBA-ni adhoc committee-ko dilna gita seokako man·gipa manderangara, president-na Sengrak D Marak, vice president-na Torang R Marak, secretary-na Teningbirth M Sangma, joint secretary-na Pramod Koch, treasurer-na Ganesh Roy aro sakdok executive membor-rang ong·a.
