SHILLONG: Robibar saloni Sombar salona konta 24-ni gisepo Meghalaya a·dok gimiko sak 5 manderang COVID-19 man·daptaiaha aro ia apsan salon a·doko mande saksa COVID man·e siangdapaha.
Konta 24-ni gisepo COVID-19 man·dapgipa sak 5 manderangko channe da·o Meghalaya a·dok gimiko COVID-19 man·e dongenggiparang gimik sak 94 gapengaha aro ia apsan salon mande saksa COVID-19 man·e siangdaptaiahani gimin a·dok gimiko COVID man·e sianggiparangara gimik sak 1479 gapskaengaha.
Konta 24-ni gisepo COVID man·gipa sak 5 manderangoni, sak 1-de East Garo Hills-o, sak 3-de East Khasi Hills-o aro sak 1-de West Garo Hills a·jao ong·a.
Salsani gisepo COVID man·e sianggipa mande saksara East Khasi Hills a·jao ong·a.
Ia apsan salon gimik sak 23 manderang Meghalaya a·dokni dingtang dingtang biaprango COVID-19-oni nampilskana man·aha aro uandaken ia COVID-oni nampilgiparangba gimik sak 83,184 gapskaengaha.
