TURA: Tura-ni ICFAI university campus-ona matchok mangsa Robibar attamo ma·brangbaaha aro ia matchokko Wildlife department-ni manderang rim·e ra·angkujaengani a·selan Sombar salona kingkingan dongkuengachim ine kobor on·timgiparang u·iataha.
Kobor on·timgiparangni u·iatani gitade, ia matchok, ANVC dolni gitcham chairman Dilash Marak-ni chalaienggipa private zoo-oni ma·brangbaaha aro ia matchok Robibar attamon ICFAI campus-ona ma·brangbaahachim.
ICFAI university-ni campus-ona ma·brangbaa bakan ICFAI-ni security guard-rang, university-ni official-rangna u·iataha aro uandaken darangba ia matchokko goe ra·angna man·jana gita university-ni gate-rangko chipe donchina gita official-rang u·iatskaaha.
Ia matchokni bidingo ICFAI-ni official-rang, Wildlife-ni official-rangna u·iatahachim indiba Sombar salona kingkingan Wildlife-ni manderang ia matchokko rim·ekujani gimin Sombar attamo ia matchokni bidingo West Garo Hills a·jani Deputy Commissioner Ram Singh-na u·iataha aro uni ja·manosa ua Wildlife-ni official-rangna ge·etaniko on·atskaaha.
