SHILLONG: Meghalaya a·doko niam gri koela bikotani aro salruraanirang batroroenga ine matnanganirangko man·engani gimin iani bidingo jakgitele am·sandianiko dakatchina gita a·dokni Opposition Congress dol, a·dok sorkario dabiangaha.
“Kakketko ma·sina man·na gita jakgitele am·sandianiko dakatna nangchongmota. Meghalaya a·doko niam gri koela, rong·chun aro uandakgipa a·ningni bosturangko badingengani a·selan a·dok kangal ong·batroroangengaha,” ine Mongolbar salo, Meghalaya Pradesh Congress Committee (MPCC)-ni working president PN Syiem, kobor ra·timgiparangna parakataha.
Meghalaya a·doko niam gri koela bikotaniko pilakan nikna man·enga aro iako darangba dongnuna man·jawa ineba Syiem aganaha.
“Koela a·damo donggipa mande jekoba sing·e niaibo, uamang pilakan iako paraktokaigen. A·doko niam gri koela bikotaniara dongnuna man·gipa kam ong·jaha,” ine ua aganaha.
Walni somoirango ritchani ritcha truck garirang, maming challan gri koelarangko salangenga ineba MPCC-ni working president parakataha.
“A·doko niam gri koela badingengani a·sel a·doko man·dapanirang komiengaha, uni gimin niam gri koela badinganiko champengna gita sorkari ta·raken ja·ku de·na nanga,” ine Syiem aganaha.
