TURA: Krismas aro Bilsi Gitalni somoirango bomarangko so·na aro palna sim·na gita South West Garo Hills a·jaoba District Administration-ni gita niamrangko donataha.
South West Garo Hills Deputy Commissioner-ni u·iatani gitade, Krismas aro Bilsi Gitalni somoirango balwako moila ong·atgipa aro agre jangdugae gam·gipa boma so·aniko champengataha.
Bomarangko walni 10:00 bajionasan so·na man·aigen indiba Krismas aro bilsi gitalni walode bomarangko wal 11:55 bajioni pringwalni 12:30 bajiona on·skagen ineba DC-ni on·gimin niamrango parakataha.
Bomarangko, hospital, nursing home, health centre, skul, college, court, olakkiram aro uandake jrip dongna nanggipa biaprangoni metre 100-ni ning·o so·na man·jawa ineba u·iataha.
Bomarangko licence donggipa manderangsan palna sim·na man·aigen.
