TURA: Kharkutta constituency-ba Meghalaya a·doko dal·batsranggipa constituency-rangoni damsa ong·engoba pilakni gita namdapatanirangko ra·bana nangengani gimin Kharkutta-ni MLA Rupert Momin, ia pilak nanganirangko janape a·dokni Chief Minister Conrad Sangma-na chitti sedoataha.
Kharkutta constituency-ni ning·o namgipa skul aro college-rang dongkujaengani a·sel chatro chatrirang namgipa lekka porako ra·na man·jaengani gimin ia constituency-ni ning·o namgipa LP, UP, Secondary, Higher Secondary skulrangko aro college-rangko kulie on·china gita Momin, a·dokni Chief Minister-ko didiataha.
Kharkutta constituency-ni ning·o songdongenggipa manderangna namgipa sanna banani cholrangko on·ani bidingo janapatengon, Chilpara sub-centre-ko PHC-ona ra·doatchina, Rangket songo sub centre-ko kulichina, Wageasi aro Rajasimla PHC-o nanga gita bosturangko on·china, Kharkutta PHC-ko palang ge 100 gnang CHC-ona ra·doatchina, Kharkutta-o Ayush centre, Pathology, Microbiology aro Bio-Chemistry Laboratory-rangko kulichina gita MLA mol·molataha.
Kharkutta jolo songdongenggipa manderang, bank-ni kamrangko ka·anio neng·nikanirangko chagrongna nangtokengani gimin Kharkutta-o Meghalaya Cooperative Apex Bank (MCAB)-ko ATM baksa kulie on·china gitaba Momin, a·dokni chief minister-ko didiataha.
Kharkutta jolrango dingtang dingtang gama ge·ani bosturangko bang·en man·engani gimin Kharkutta-o Agriculture aro Horticulture department-ni office nokrangko kulie on·china gitaba MLA didiataha.
Kharkutta constituency-ni ning·o songdongenggipa manderang ringani chirangko chu·onga gita man·jaengani gimin India sorkarini ra·gatgipa Jal Jeevan Mission-ni ning·o, ia constituency-ni nokantionan ringani chirangko sokate on·china gitaba Momin didiataha.
Kharkutta constituency-ni ning·o rama jal·langrangko namdapatna nangengani gimin janapatskaengon, Kentra-oni Dainadubi-ona, Adokgre-oni Mingkrak-ona aro Adokgre-oni Dilma Adap Sakwagre-ona dakanggipa ramani pilak bolni dolongrang baksana Baksalpara dolong, Upper Jambal dolong, Konchikol Apal dolong aro Rajasimla Mongsi dolongko RCC tarichina gita Kharkutta-ni MLA didiataha. Chotcholja-oni Watregittim-ona, Chotcholja-oni Silki-ona, Megan Akong-oni Rateka gita Baksalpara-ona, Mendima-oni Majipara aro Chotcholja Bolsaldam songona dakanggipa ramarangko black topping on·e taridapchina gitaba Momin, a·dokni Chief Minister-ko mol·molataha.
Adokgre aro Baghabata-o Shopping Complex-ko rike on·china aro Kharkutta-o Sports Academy baksana Indoor Stadium-ko rike on·china gitaba Momin, a·dokni Chief Minister-ko didiataha.
Kharkutta constituency-o mobile network-rang namsrangjaengani giminba dingtang dingtang biaprango mobile tower-rangko songdapchina gita Kharkutta MLA mol·molataha.