SHILLONG: A·gilsak gimikon da·o COVID-19-ni gital ‘Omicron’ rokom giprorona a·bachengengahaon ia sabisiko warachakna gita Meghalaya sorkari chu·gimik tarisamsoa dongkujaenga ine Mongolbar salo, Congress dol a·kangataha.
“A·dok sorkari ia gital rokomna chu·gimik tarisamsokuja. Europe a·songrango ia gital Omicron gipengaha aro India a·songoba ia gital rokomko man·giparang dongahani gimin an·chingni a·dokonaba basako sokbagen an·ching agansona man·ja. Uni gimin sorkari chu·gimik tarisamsona nangchongmota,” ine Meghalaya Pradesh Congress Committee (MPCC)-ni working president PN Syiem parakataha.
Maini gimin a·dok sorkari, Omicron-na tarisamsokujaenga ine ua aganenga ine sing·on, a·dokni PHC ba CHC-rangona re·ange nigenchimode maming tarisamsoanirangko nikna man·jawa ine Syiem parakataha.
Gittamgipa changna COVID-19-ni giproroaniona a·dok sorkari, chu·gimik tarisoaha ine a·kangenggipa kattarangna aganchakaniko on·angengon, “Chingna sakkirangko mesokchengbo. Ia gittamgipa changna COVID-ni giproroaniona badita sak health worker-rangko ra·aha? Kattachi aganana agrede sorkario maming tarisamsoanirang dongkuja,” ine MPCC-ni working president parakataha.
Meghalaya a·dokoba COVID-19-ni ‘Omicron’ rokomko warachaksona gita a·dok sorkari mikraken kam ka·soenga ine adita salrangna skangsan a·dokni Health Minister James Sangma parakatahachim ine nikna man·a.
