SHILLONG: Bharatiya Janata Party (BJP) dongenga dipetde National People’s Party (NPP)-chi dilenggipa Meghalaya Democratic Alliance (MDA)-o Congress dol bakrimna man·jawa ine Budbar salo, Meghalaya Pradesh Congress Committee (MPCC)-ni working president PN Syiem parakataha.
Syiem-ni parakatani gitade, a·doko manderangni nangchongmotenggipa dingtang dingtang kamrang jekai, Inner Line Permit (ILP), Khasi aro Garo ku·sikrangko Constitution-ni Eighth Schedule-o man·chapatani aro uandakgipa kamrangosa Congress dol, MDA sorkarina chakpaaniko on·engachim.
“Congress dol, maming dakeba BJP baksa bakrimna man·jawa aro BJP dongenga dipetde MDA-o bakrimna man·jawa. A·doko nangchongmotgipa kamrangna dabianiosa chinga MDA sorkarina chakpaaniko on·enga indiba da·o dipet Congress dol, MDA-o bakrimkuja,” ine MPCC-ni working president parakataha.
A·dokni nangchongmotgipa kamrangko ka·anio MDA sorkarina chakpaaniko on·na gitasa adita salrangna skang, Congress dolni sakbonga MLA-rang, a·dokni Chief Minister Conrad Sangma-ko grongeaha ineba Syiem, talataniko on·angaha.
Meghalaya a·doko Congress dolni bangki sakbonga MLA-rangkoba Trinamool Congress (TMC)-o napchina gita a·dokni gitcham chief minister aro Meghalaya a·doko All India Trinamool Congress (AITC)-ko dilenggipa Dr Mukul Sangma-ni agangipa kattarangni gimin janapatskaengon, Congress doloni ong·kate AITC-o napanggipa sak 12 MLA-rangko Assembly-oniko ra·galchina dabienggipani bidingo Assembly-ni Speaker ja·kuko de·na siengani gimin ia sak 12 MLA-rangan Congress dolona re·bapilo nambatgen ine MPCC-ni working president parakatskaaha.
“Ia sak 12 MLA-rangni kosako Assembly-ni Speaker mai dakgipa ja·kuko de·gen darangba ma·sikujaenga aro uamang una skangan Congress dolona re·bapilon nambatgen,” ine Syiem aganaha.
Tenth Schedule-o on·gimin bilrangko gimaatjana gita iani bidingo name sandichengesa ia sak 12 MLA-rangni kosako nanga gita ja·kurangko de·china gitaba ua Assembly-ni Speaker-ko didiangaha.