TURA: Tura-o adita sak chadamberang, ramao palgipa cha·anirangko cha·e saanirangko man·na nangaha aro me·tra saksade ramao palgipa ringaniko ringani ja·man okgitchak sae hospital-o admit ka·ako man·na nangaha ine kobor on·aha.
Koborko on·ani gitade, saaniko man·gipa chadam-berangoni sakgnide Tura Super Market a·palo cha·a-ni palgipaoniko cha·aha-chim aro bilongbate saako man·gipa me·tra saksade, Hawakhana-o donggipa fast food damsaoniko buttermilk-ko ringahachim.
Ia chadambe sakgittam-an ramao palgipa cha·ani ringanirangko cha·e ringe bakan ok re·ruruan baksa chigalna a·bachengaha aro me·tra saksakode okgit-chak saani ja·man Tura Civil Hospital-ona ra·angna gita nangaha. Gipin chadambe sakgninaba nanga gita sanna bananirangko on·-enga ine kobor on·timgi-parang u·iataha.
Indake ong·engon, Ringreoba mande sakgni, ramao palgipa dokkanoniko cha·ani cha·ani ja·man saanirangko man·aha ine koborko man·soaha indiba iani bidingo da·o dipet tale ma·sina man·kujaenga.
Iani bidingo West Garo Hills a·jani Deputy Commissioner Ram Singh, kobor ra·timgipa manderang baksa agangrikengon, ia a·selrangni gimin kakketko am·sandichina gita ge·eta-niko on·manaha aro food security officer-koba nanga gita am·sandianirangko dakchina ge·etaha ine parakataha.
