TURA: Jisu Kristoni atchiani salko gisik ra·e a·gilsak gimik manitokengon ia salko Garo Hills-oba tom·tome aro kusi ong·bee manderang maniangtokaha.
Ia changoba Krismaso COVID-19 giproroengani gimin sorkari dingtang dingtang niamrangko donahani a·sel pangna bilsi gita manina man·jahaoba Krismasni salko nichaksona gita Garo Hills-ni pilak biaprangon December 24 tarik attamonin manderang tusigija walko nichaksotokaha aro uandaken 12:00 baji ong·ahaon manderang bomarangko so·na, saksa sakgipinna an·tangtangni namgipa skanirangko on·na aro gitrangko ring·an baksana gitrangko wate jinma chrok mesae rona a·bachengtokaha.
Ia bilsioba COVID-19-na sorkari adita niamrangko donatahaoba niamrangko olgrokatahani gimin ia changode bang·a biaprangon manderangni jinma tom·e olakkianirangko aro jinma apsan cha·rim ringrimanirangko nikna man·aha.
December 25 tarik pringoba Garo Hills-ni pilak biaprangon manderang gilja nokrango jinma tom·e olakkianirangko nikna man·aha aro gilja jokani ja·mano bang·bata song aro gittimrangon, manderangni jinma kusi ong·e cha·rim ringrimanirangko nikna man·aha.
Pangna bilsi dakrongbaenga gitan ia bilsioba dama doke aro git wate chrok mesaanirangko Garo Hills-ni bang·a biaprangon nikna man·aha indiba Tura-o gari gora sale roramgiparang ia chango namen komibataha ine mikrontangchi nikgipa manderang u·iataha.
Pangna bilside December-ni 24 tarik walo Tura-ni ramarango garirangni apchangket ong·pilanirangko nikna man·rongachim indiba ia changode garirangni re·ruraanirangko indita nikna man·jaha ine kobor on·timgiparang u·iataha.
Tura-o ia changoba pangna bilsirangna bate teng·suate taritilonganirang komibataha ine nikna man·aha indiba badiaba badiaba biaprangode nikronggijagipa taritilonganirangkoba nikskana man·aha.
Goeragre-o ia chang 2nd MLP Battalion-ni gita ‘Winter Wonderland’ ine bimingko done manderang nina gita biapko tarisoaha aro Krismasni somoirango hajalni hajal manderang, ia biapona re·ange ia biapko niena gita cholrangko man·tokaha. Ia biapona hajalni hajal manderang re·ange nietokahani a·sel ramarango garirangni apchangket ong·aniko nikna man·aha indiba ua biapo 2nd MLP-ni sipairang nambee kamrangko ka·soenba, manderangna re·rurana gita cholrangko on·aha.