TURA: Sonibar salo, Meghalaya a·dokni Chief Minister Conrad K Sangma, Tura-o taridapenggipa PA Sangma Stadium-ko nina re·angaha aro ia stadium-ko tarianio kamrang ka·sinengani gimin an·tangni suk ong·gijaniko parakataha.
Ia PA Sangma Stadium-ni ning·o PA Sangma Integrated Sports Complex-koba rikna gita pangchakani ro·ongko PA Sangma-ni depante aro a·dokni Chief Minister Conrad K Sangma an·tangan, re·anggipa 2020 bilsini March 4 tariko PA Sangma-ni brigipa siani salko maniani somoio songe on·angahachim.
Indake ong·engon, ia PA Sangma Stadium-ko taridapanio kamrang ka·sinenga ine a·dokni Chief Minister an·tangni suk ong·gijaniko parakangenba, ia stadium-ko ta·raken matchotatchina gita department-na ge·etaniko on·angaha.
Iana skang ua, Tura Chandmary-o tarienggipa Football ground-koba nieaha aro ia robol kal·chakgipa biapko tarianio kamrang ta·rakengani gimin an·tangni kusi ong·aniko parakatskaaha.