SHILLONG: Meghalaya a·dokni dal·batsranggipa Indian Police Service (IPS) officer-rangoni saksa Idashisha Nongrang-ko full fledged ba chu·gimik bil gnange a·dokni Director General of Police (DGP) songchina gita Robibar salo Congress dolni dilgipa Process T Sawkmie, a·dok sorkariko didiangaha.
Nongrang-ko adita salrangna skangsan a·dok sorkari, acting DGO dake songe on·ahachim ine nikna man·a.
1992 bilsini IPS officer Idashisha Nongrang-ko gital DGP-ko songkujaskal a·dokni acting DGP dake sorkari songe on·angahachim.
Indake ong·engon, da·o dipet Nongrang-an a·doko dal·batsranggipa IPS officer ong·enga ine uko chu·gimik bil gnanggipa DGP songchina Congress dolni dilgipa didiangaha.
“Da·o dipet Nongrang-an a·doko ja·delbatsranggipa IPS officer ong·engani gimin ua DGP songako man·na krachongmota,” ine Sawkmie parakataha.
Adita salrangna skangsan, RV Suchiang-ba a·dokni skanggipa Chief Secretary ong·e songako man·gipa Khasi me·chik ong·aha ineba Sawkmie parakataha.
“Nongrang-ko DGP-ko songgenchimode uan Khasi-rangoni skanggipa me·chik DGP ong·na cholko man·gnokchim aro ian a·dokna mikkim rasongko ra·baani gita ong·genchim,” ine Sawkmie aganaha.
Joltangni mandesa a·dokni obostarangko nambate ma·sina man·a ine janapatengon, a·doko police dolko dilna gita sorkari, skanggipa a·doktangni manderangkon sandichengna nanga ine Congress dolni dilgipa parakataha.
Indake ong·engon, a·dokni gital DGP-na sorkari, sakbonga manderangni bimingko Home Affairs Ministry-ona watatna sienga ine kobor on·timgiparang parakataha.
