TURA: Meghalaya a·dokni SSA skulrango skigiparangna jagnini dormaharangko, chong·motan August aro September jagnini dormahako on·na gita sorkarini ku·rachakahani gimin A·chik Holistic Awakening Movement (AHAM), a·dok sorkariko mittelpilangenba, SSA skigiparangna ku·rachakgimin dormaharangko ta·raken on·skachina sorkariko didiangaha.
SSA skulrango skigiparang, re·anggipa August jaoni December jaona kingking jabongani dormaharangko man·tokkujaengani gimin re·anggipa December-ni 24 aro 25 tarikrango salgnina Meghalaya a·dokni Chief Minister Conrad K Sangma aro Tura-ni MP Agatha K Sangma-ni nok mikkango okumu chake jingjengatna manchiahachim indiba skigiparangna jagnini dormaharangko on·na sorkari ku·rachakahani gimin skigiparangni okumu chake jingjengatna manchianiko dontongatpilchengahachim.
Indake ong·engon, SSA skigiparangni okumu chake jingjengatanio AHAM-ni membor-rangba bakko ra·pana gita tarisoahachim ine AHAM-ni president George Prince Cheran Momin parakatenba, mikkangchiba AHAM-ni membor-rang, SSA skigiparangna bakrimaniko on·e uamangni duk chake jingjengatanirangoba bakko ra·angpagen ine parakataha.
“SSA skulrango skigiparang indita jarangni dormaharangko man·jae da·o gita Krismasni salrangoba duk mikchi baksasa manina nangtokenga aro iana AHAM-ba kalimpaaniko on·enga. Mikkangchiba skigiparangni man·gnirangko sorkari iandake on·jagenchimode chinga AHAM-ni gitaba skigiparang baksa bakrimangkugen aro nanggenchimode skigiparang baksa bakrime jingjengatanirangko dakanggen,” ine AHAM-ni president parakataha.
