TURA: North Garo Hills a·jani Kharkutta constituency-o paragliding-ko a·bachengatahani gimin gipin biaprangoni rona re·baenggipa manderangsan ong·aigija jolo songdongenggipa manderangba kusi ong·aniko paraktokaha.
Kharkutta-o ia paragliding-ko Nepal a·songoni saksa Bishnu Chetry minggipa mandechi dilenggipa dol dakdilenga aro ia paragliding-ko Kharkutta-o a·bachengatahani gimin gipin biaprangoni rona re·baenggipa manderangba kusi ong·aniko paraktokaha.
“Ia biapo paragliding-ko a·bachengataniara namen namgipa ja·ku de·ani ong·aha maina chinga paragliding-ko dakna gita skangode Darjeeling, Sikkim aro gipin biaprangonasa re·angna nangrongachim indiba da·ode chinga Assam-oniba sepangbatgipa biaponan re·bae ia paragliding-ko dakna man·paengaha,” ine Assam-oni re·bagipa mande saksa aganaha.
Ia Kharkutta songara Guwahati songjinmaoba kilometre 100-mangsan chel·grikaiachim aro Guwahati-chipakni re·bagenchimode NH-17 ramako re·bae Assam a·dokni Goalpara a·ja ning·o donggipa Darranggre song gita kilometre 5-mangni gitasan re·na nangaiahachim.
“Kharkutta songara namen an·sengbegipa song ong·a aro chinga paragliding-ko dake ia songo donggipa a·bri aro chiring chibisikrangko nina man·a,” ineba ua aganaha.
Kharkutta-o ia paragliding-ko dakdilenggipa Bishnu Chetry-ni aganani gitade, ia paragliding-ko dakanio mongsonggipa bakara bilchakatani aro ong·onanian ong·achim aro da·o dipet uamang ia biapo chang 50-na baten paragliding-ko dakmanaha.
Kharkutta-o ia paragliding-ko a·bachengatani gimin Kharkutta-ni MLA Rupert Momin-ba talataniko on·angengon, Kharkutta songo nitobegipa aro rona rotobegipa biaprang bang·en donga aro uamang gipin biaprangoni tourist-rangko salbana gita ia paragliding-ko a·bachengataha ine parakataha.
Mikkangchi Kharkutta jolrango tourism-ko tang·doatna gita ua dingtang dingtang kamrangko a·bachengatna miksongenga ineba Momin parakataha.
Photo: Kharkutta-o a·bachengatgipa paragliding.
