SHILLONG: Khasi-Jaintia a·dokna dabiani aro Indian Constitution-ni ning·o donggipa Sixth Schedule-ni Para 12A (b)-ko taridapanian 2023 bilsini Assembly election-o Hill State People’s Democratic Party (HSPDP)-ni mongsonggipa miksongani ong·gen ine Sombar salo HSPDP-ni president KP Pangniang parakataha.
Sombar salo, HSPDP-ni general council tom·aniko ong·atani ja·man kobor ra·timgipa manderang baksa agangrikengmiting somoio ia kattarangko HSPDP-ni president parakataha.
“Chingni matchotgija dongenggipa miksonganirangko ia tom·anio chinga nipilangaha. Indian Constitution-ni ning·o donggipa Sixth Schedule-ni Para 12 A(b)-ko taridapchina chingni dabienggipani bidingo chinga India sorkario dabiangkugen,” ine Pangniang aganaha.
Maini gimin uamang Khasi aro Jaintiarangna dingtang a·dokko dabiengachim, uani bidingo manderangna talate on·angna gitaba ia tom·anio uamang chanchiaha ineba HSPDP-ni president parakataha.
“Dingtang Garoland a·dokna dabienggipa Garo State Demand Committee (GSDC) baksa nangrime chinga kamko ka·angkugen aro iani bidingo ma·mong sorkariko didiangkugen,” ine Pangniang aganaha.
Khasi-Jaintia a·dokna dabianio uamang joltangni gipin dolrangkoba bakrimchina didigenma ine sing·on, da·o dipetde iani bidingo gipin dolrangko didina gita agre seng·gnangkuenga ine HSPDP-ni president parakataha.
“Da·o dipetde chingni mongsonggipa miksonganian chingni dabianio manderangni bakrimaniko aro chakpaaniko man·anisa ong·enga. Khasi aro Jaintia a·dokko man·anichi mai namgnirangko man·gen, uani gimin chinga manderangna talate on·anggen,” ine Pangniang aganaha.
Indake ong·engon, Khasi aro Jaintiarangna dingtang a·doko dabianian HSPDP-ni mongsonggipa daito ong·enga ine HSPDP-ni vice presidemt Renikton L Tongkhar parakatskaaha.
Da·o dipet uamang manderangni bakrimanikosa man·na jotton ka·enga aro gipin political dolrangni bakrimanikode ra·kujawa ineba Tongkhar parakataha.
2023 bilsini Assembly election-ni ja·man dingtang dingtang dolrang nangrime sorkariko riktaiahaon, Khasi-Jaintia a·dokna dabianiko common minimum program-o chapatna man·gnok ineba HSPDP-ni vice president parakataha.
NPP-chi dilenggipa MDA sorkari, ru·uta bilsirangonin namatchipna man·jaenggipa Assam-Meghalaya a·dokni simarango meligrikna man·jaenggipako namatna gita ja·ku de·chakataha ineba HSPDP-ni dilgiparang, kusi ong·aniko parakataha.
