SHILLONG: Re·anggipa jao Congress doloni ong·kate All India Trinamool Congress (AITC)-o napanggipa sak 12 MLA-rangni kosako Assembly-ni Speaker, maming ja·kuko de·na jechakahani gimin ia MLA-rangni kosako ja·kuko de·ani bidingo Congress dol, da·o bilsi gitalko maniani ja·man chanchirimna gita manchiangaha.
Sombar salo Meghalaya Pradesh Congress Committee (MPCC)-ni president Vincent Pala-ni parakatani gitade, Congress doloni ong·kate katgipa sak 12 MLA-rangko Assembly-oniko ra·galchina dabianiko Assembly-ni Speaker jechakani ja·man Congress dolni dilgiparang, iani bidingo chanchipiltaia dongkujaengachim.
“Uni gimin mikkangchi ia MLA-rangni kosako ja·ku de·ani bidingo chinga bilsi gitalko maniani ja·man apsan asonge chanchirimanggen,” ine Pala aganaha.
Congress doloni ong·kate Trinamool Congress dolo napanggipa sak 12 MLA-rangni kosako ja·kuko de·china gita Congress Legislature Party (CLP)-ni dilgipa Ampareen Lyngdoh-sa Speaker-na sedoatchengahachim.
Ia sak 12 MLA-rangni kosako Assembly-ni Speaker, ja·kuko de·na jechakani ja·man Lyngdoh an·tangde iani bidingo mamingkoba jako ra·taijawaha ine parakatskaahachim.
Lyngdoh-ni parakatani gitade, 2022 bilsiode Congress dolni dilgiparang, 2023 bilsini Assembly election-na campaign ka·na a·bachenggnok indiba ia pilakan MPCC-ni president Vincent Pala-ni jakosa ong·aigen.
Sak 12 MLA-rangni Congress dolko watgale Trinamool Congress (TMC)-o napanganiara Indian Constitution-ni Tenth Schedule ning·o on·gipa Paragraph 4-ni gitade niamo ong·aia aro ia sak 12 MLA-rang, Assembly-oniko ra·gala man·na kraja ine re·anggipa antio Meghalaya Legislative Assembly-ni Speaker Metbah Lyngdoh parakatahachim.
Meghalaya a·doko Congress dolni MLA-rang sakbongasan dongaiahani gimin Trinamool Congress-am da·o mongsonggipa opposition dol ong·skaengahachim.