SHILLONG: Re·anggipa Sombar salo, Hill State People’s Democratic Party (HSPDP)-ni general council tom·aniko ong·atanio KP Pangniang-ko HSPDP-ni president songpiltaiaha.
2018 bilsini Assembly election-ni ja·man HSPDP-ni gitcham president Ardent Miller Basaiawmoit, doltangoni ong·katangani ja·man president-ni kamko Pangniang ra·rikskaahachim aro uandaken da·oba uko HSPDP-ni president songpiltaiaha.
Ia tom·anio HSPDP-ni MLA sakgni, chong·motan Renikton L Tongkhar aro Samlin Malngiang baksana MDC Martle N Mukhim-koba vice president-na seokangjolaha.
Panbor Rynthathiang-ko HSPDP-ni general secretary-na seokskaaha aro Nolipstar Lyngdoh baksana Banrikupar Wahlang-ko joint secretary-na seokskaaha.
Ia tom·anio HSPDP-ko dilna gita seoka man·gipa gipin manderangara, finance secretary-na Manstudy Nongrem, treasurer-na Diosstarness Jyndiang aro chief organiser-na Witting Mawsor ong·a.
HSPDP-ni president KP Pangniang-ni kobor ra·timgiparangna u·iatani gitade, HSPDP-ni general council-ni bon·kamgipa tom·aniko 2017 bilsiosa ong·atahachim aro uandaken ia tom·aniko da·o Sombar salo ong·attaiaha.