SHILLONG: Ri Bhoi a·jani Jorbil songo aro ia songni wilwilao namroro silroroaniko ra·bana gita ia songko University of Science & Technology Meghalaya (USTM) jako ra·gen ine Mongolbar salo u·iataha.
Mongolbar salo, Krismas aro Bilsi Gitalko maniani bak gita ia Jorbil songni Nokma Ensath Sangma baksana songni gipin dilgiparangna mande ra·pilskaaniko dakanganio USTM-ni Chancellor Mahbubul Hoque jinmana aganprakengon, USTM-ni gita ia songko jako ra·e ia songnasan ong·aigija samba jolrango donggipa songrangoba namroro silroroaniko ra·bana kam ka·gen ine parakangaha.
“Ia songni bi·sarangna chinga indin lekka porako on·enga aro ia songan USTM-ni namroro silroroanina kam ka·aniko mesokgipa ong·china. Samtangtango ong·telaigiparangko ripinge rakkina gitaba an·ching pilakan kamko ka·na nangenga,” ine Hoque aganaha.
Dingtang dingtang namroro silroroani kamrango, kal·susaanirango aro uandakgipa gipin kamrango namroro silroroaniko ra·bana gita USTM baksa bakrimchina ua dingtang dingtang dolrangkoba didiangaha.
