SHILLONG: India a·songni dingtang dingtang biaprangoba COVID-19-ni gital Omicron rokom giproroengahani gimin Meghalaya a·doko ia Omicron rokomko champengsona man·na gita dingtang dingtang dolrangko songe on·china a·dokni Congress dol, a·dok sorkariko didiangaha.
Ia Omicron rokomara gitcham rokomrangoni namen dingtanggipa rokom ong·a ine janapatengon, a·doko ia kenbegnigipa sabisiko warachaksona gita sorkari dingtang dingtang kamrangko ka·nagipa dolrangko songe on·na nanga ine Congress Legislature Party (CLP)-ni dilgipa Ampareen Lyngdoh parakataha.
“Sajinmako warachaksoanio chingaba sorkari baksa bakrimna kusi ong·enga aro ia sajinmako warachaksona gita dingtang dingtang kamrangko ka·anio sorkarini dingtang dingtang dolrangko bikotanikosa chinga nangnikenga,” ine Lyngdoh aganaha.
Ia gital rokomna porikka ra·animangmangba namen dingtanga aro rakbata ine janapatengon, “Angna talate on·ani gitade ia Omicron-ko ma·sina gita komibeoba salgittam ba salbriko nanga, uni gimin an·ching namen mikrakbee kamko ka·sona nangenga,” ine CLP-ni dilgipa parakataha.
Delhi songjinmaode da·o club-rangko aro skulrangko chippiltaina nangengaha ine janapatengon, gipin biaprango ong·enga obostarangko nie a·dokoba mikrake kamko ka·sona nangengahachim indiba da·onan gipin biaprangoni re·ruraenggipa manderangna a·doko niamrangko donkujaenga ine Lyngdoh parakataha.
“An·chingba mikrake kamrangko ka·sona nangengahachim indiba an·ching je biaprangoba da·onan gipin biaprangoni re·bagipa tourist-rangko nikna man·engkua. Meghalaya a·doko tourism-ko chippiltaibo inede chinga aganjaenga indiba nangchongmotgipa biaprango porikka ra·ani biaprangko donate a·dokni manderangko chel·chaksona nanga,” ine Lyngdoh aganaha.
