SHILLONG: Re·baenggipa 2023 bilsini Assembly election-na skang, bangki dongkuenggipa Congress dolni sakbonga MLA-rangba joltangni dingtang dingtang dolrango naptokna sienga ine jangbingbanganiko Meghalaya Pradesh Congress Committee (MPCC)-ni president aro Shillong-ni Lok Sabha MP Vincent H Pala jegalataha.
“Ia pilakan tol·e jangbingbanganisan ong·aia maina chingni MLA-rang pilakan ja·delgimin dilgiparangsa ong·a aro an·tangtangni kamrangko ma·sigiparang ong·a,” ine Pala aganaha.
Meghalaya a·doko Congress dolni sak 12 MLA-rang, Trinamool Congress-o napangtokahani ja·man da·o Congress dolo MLA sakbongasan dongaiahachim aro ia sakbonga MLA-rangba gipin dolrango napangtokna sienga ine jangbingbanganirangko knasona man·ahachim.
Congress dolni sakbonga MLA-rang pilakan joltangni gipin political dolrango nape 2023 bilsini Assembly election-o susana miksongenga ineba koborrangko man·soahachim.
Indake ong·engon, iandake jangbingbanganiranga manderangni gisepo jajaataniko ra·bana jotton ka·anisan ong·aia ine MPCC-ni president talataniko on·angskaaha.
“Chingni MLA-rang gipin dolrango napangani katta nakatja aro kakketko agangenchimode gipin dolrangni dilgiparangsa ching baksa bakrimna sienga,” ine Pala aganaha.
